2009 წლის 29 სექტემბერს, ევროპის საბჭოს საპარლამენტო ასამბლეამ განიხილა და მიიღო რეზოლუცია "ომი საქართველოსა და რუსეთს შორის: ერთი წლის შემდეგ". რეზოლუცია მიღებულ იქნა ასამბლეაში გამართული დებატების შემდგომ, სადაც ყველა გამომსვლელმა, რუსეთის დელეგაციის წევრების გარდა, კიდევ ერთხელ დაადასტურა ამ პან-ევროპული ორგანიზაციის სრული მხარდაჭერა საქართველოს ტერიტორიული მთლიანობისა და სუვერენიტეტის მიმართ.

გავრცელებული ინფორმაციის თანახმად, 2009 წლის 28 სექტემბერს რუსეთის ფედერაციასა და აფხაზეთის მარიონეტულ რეჟიმს შორის გაფორმდა მემორანდუმი კომუნიკაციების სფეროში თანამშრომლობის შესახებ. ხსენებული ინფორმაციით, რუსეთის ფედერაციამ აღნიშნული მემორანდუმის საფუძველზე აფხაზეთის მარიონეტულ რეჟიმს გადასცა ფიქსირებული (საკაბელო) და უკაბელო ფიჭური კავშირგაბმულობის სატელეფონო კოდებით სარგებლობის უფლება. აღნიშნული კოდებით სოხუმის რეჟიმი სარგებლობას მომავალი კვირიდან გეგმავს.